Ebaluazio-kiten salmenta-baldintza orokorrak
2026ko urriaren 29ko bertsioa. Itzulpena da: bertsioen artean desberdintasunik badago, gaztelaniazko bertsioa nagusitzen da.
1. Xedea
Salmenta-baldintza orokor hauek ("Baldintzak") KLISKATEK, S.L.-k ("Kliskatek") ebaluazio-kitak eta -produktuak ("Produktuak") kontsumitzaileak ez diren bezeroei ("Bezeroa") saltzea arautzen dute. Kliskateken helbide soziala Paseo Miramón 170, 20014 Donostia / San Sebastián (Gipuzkoa) da; IFK B-44817310 du, eta Gipuzkoako Merkataritza Erregistroan inskribatuta dago, 3092. liburukia, 217. folioa, SS-45666 orria, 1. inskripzioa.
2. Enpresentzat eta erakundeentzat soilik
Kliskatekek enpresei, profesionalei, unibertsitateei, ikerketa-zentroei eta beste erakunde batzuei soilik saltzen dizkie Produktuak, haien jarduerarako. Bezeroak bere eskaeran adieraziko ditu bere sozietate-izena eta bere IFZ edo BEZ zenbakia. Profesional batek ere eros ditzake Produktuak bere izenean, bere lanean erabiltzeko, adibidez bere enpresari gastu gisa pasatzeko; kasu horretan, eskaerak adieraziko du zein enpresa edo erakunderentzat erabiliko dituen. Kliskatekek uko egin ahal izango dio kontsumitzaile batek egindako edozein eskaerari, edo datu horiek ez dituen edozein eskaerari.
Eskaera egitean, Bezeroak adierazten du (i) kontratatzeko gaitasuna duela, (ii) ez duela kontsumitzaile gisa jarduten inolako legeriaren arabera, eta (iii) Baldintza hauek irakurri eta onartzen dituela.
3. Baldintzak onartzea
Baldintza hauek Produktuen eskaera orori aplikatzen zaizkio, eta beste edozein termino edo baldintza baztertzen dute, Bezeroaren erosketa-baldintza orokorrak barne, nahiz eta Kliskateki bidali izan. Alderdien arteko idatzizko akordioz soilik alda daitezke.
4. Produktuak: ezaugarriak eta erabilera
OHARTARAZPENA: Produktuak ebaluazio-produktuak dira. Bezeroak haien oinarrizko funtzio teknikoak egiazta ditzan baino ez dute balio, etorkizuneko garapen posible bati begira. Ez dira produktu amaitua, ez dira beste erabilera baterako ezta merkaturatzeko egokiak, eta ez daude homologatuta, ezta inolako ziurtagiririk ere. Bezeroak ez ditu merkaturatuko, ezta azken produktu gisa zerbitzuan jarriko ere.
Bezeroak ezagutzen ditu Produktuen ezaugarriak eta xedea, eta Kliskatek kalterik gabe mantenduko du aurreikusitakoa ez den erabilera batetik edo erabilera oker batetik eratorritako edozein kalte edo galeraren aurrean, irabazi-galera eta zeharkako kalteak barne.
Produktuen zehaztapenak (diseinua, errendimendua, pisua, etab.) gutxi gorabeherakoak dira, sektoreko ohiko tolerantzien barruan. Kliskatekek funtsezkoak ez diren aldaketak egin ditzake Produktuen diseinuan, materialetan edo forman, entregatu arte.
Bezeroa da Produktua aukeratzearen eta hari ematen dion erabileraren erantzule bakarra. Kliskatekek ez du bermatzen Produktua egokia denik Bezeroak aurreikusita duen aplikaziorako, ezta haren helburuak lortuko dituenik ere.
Softwarea eta dokumentazioa. Produktuekin batera doazen softwarea eta dokumentazioa beren lizentziaren arabera arautzen dira, halakorik dutenean (SenseID SDK, adibidez, MIT lizentziarekin argitaratzen da). Lizentziarik ez duena, KL-Osiris kasu, doako lizentzia ez-esklusibo eta eskualdaezin batekin ematen da, Produktuekin erabiltzeko, haiek ebaluatzeko eta aplikazio propioak garatzeko, dagoen bezala eta bermerik gabe.
5. Eskaera
Bezeroak bere eskaera idatziz egiten du, sales@kliskatek.com helbidera. Kliskatekek aurrekontu bat edo proforma-faktura bat bidaliko dio, prezioarekin, bidalketa-gastuekin eta aurreikusitako epearekin. Kontratua Kliskatekek eskaera idatziz berresten duenean perfekzionatzen da.
Produktuen eskuragarritasuna alda daiteke. Eskaera berretsi ondoren Produkturen bat eskuragarri ez balego, Kliskatekek Bezeroari jakinaraziko dio, eta Produktu horrengatik ordaindutakoa itzuliko dio.
6. Ezeztapena
Behin berretsita, Bezeroak ezin izango du eskaera osorik edo zati batean ezeztatu, Kliskatekekin idatzizko akordiorik ez badago.
Kliskatekek eskaera bat ezeztatu ahal izango du, berari bakarrik egotz ez dakizkiokeen arrazoiengatik bete ezin badu (adibidez, osagaiak baldintza arrazoizko edo ohikoetan lortzeko ezintasuna). Bezeroari lehenbailehen jakinaraziko dio, eta ezeztapenak ordaindutako prezioa itzultzeko eskubidea baino ez du emango, inolako konpentsazio edo kalte-ordainik gabe.
7. Prezioa eta ordainketa
Produktu bakoitzaren prezioa aurrekontuan edo proforman agertzen dena da. Prezioek ez dute BEZa barne hartzen, ezta beste zergarik ere (fakturan gehituko dira, dagokionean), ezta bidalketa-gastuak ere, besterik esaten ez bada.
Ordainketa eurotan egingo da, banku-transferentzia bidez, proforman adierazitako kontura, bidalketa baino lehen. Bezeroak txartelarekin ordaindu nahiago badu, Kliskatekek PayPaleko ordainketa-esteka bat bidal diezaioke. Banku-gastuak eta dibisa-trukearen gastuak Bezeroaren kontura dira.
8. Bidalketa
Kliskatekek Produktuak lehenbailehen bidaliko ditu eta, nolanahi ere, ordainketa jasotzen duenetik hamar egun balioduneko epean, Espainiatik, eskaeran adierazitako helbidera eta Kliskatekek aukeratutako garraiolariaren bidez.
Entrega-epeak orientagarriak dira, ez lotesleak: helmugaren eta garraioaren araberakoak dira, eta Kliskatekek ez du haiei buruzko inolako konpromisorik hartzen. Kliskatekek bidalketa partzialak egin ditzake; kasu horretan, lehen bidalketaren gastuak baino ez dira kobratuko.
Europar Batasunetik kanpoko bidalketetan, muga-zergak, inportazio-zergak eta aduana-izapideak Bezeroaren kontura dira.
Produktuen gaineko arriskua entregarekin igarotzen zaio Bezeroari.
9. Harrera. Ageriko akatsak
Bezeroak Produktuak egiaztatuko ditu jaso bezain laster (mota, kopurua eta garraioan kalterik ez izatea).
Ageriko akatsak idatziz jakinaraziko dira sales@kliskatek.com helbidera, entregatik gehienez ere zazpi egun naturaleko epean, erreklamazioa baloratzeko beharrezko informazioarekin. Epe hori jakinarazpenik gabe igarotzen bada, bidalketa zuzena dela ulertuko da, eta ez da haren gaineko erreklamaziorik onartuko.
Erreklamazioa oinarritua bada eta epean iristen bada, Kliskateken betebehar bakarra akatsa zuzentzen duen entrega berri bat egitea izango da, atzerapenetik edo entregarik ezetik eratorritako inolako kalteren erantzule izan gabe.
10. Bermea eta erantzukizuna
Ebaluazio-produktuak direnez, Kliskatekek ez du Produktuei buruzko inolako bermerik ematen, eta ez du aurreko ataleko ageriko akatsei dagokiena baino erantzukizun handiagorik hartzen.
Edozein arrazoirengatik Kliskatekek Produktuei lotuta erantzun beharko balu: (i) ez du inola ere erantzungo Bezeroaren edo hirugarrenen kalte intzidental, zeharkako edo ondoriozkoengatik, irabazi-galeragatik, ezta ekoizpen- edo mozkin-galerengatik ere; eta (ii) Produktu batengatiko haren erantzukizunak ez du gaindituko Produktu horrengatik ordaindutako prezioa, doloa dagoenean izan ezik.
Erantzukizun-araubide legal oro baztertzen da, Kode Zibileko ezkutuko akatsengatiko saneamendua eta Merkataritza Kodearen 342. artikulukoa barne, doloa dagoenean izan ezik.
11. Jabetza industriala eta intelektuala
Produktu bat erosteak ez dio Bezeroari ematen haren gaineko jabetza industrial edo intelektualeko inolako eskubiderik, erregistratua izan ala ez; eskubide horiek Kliskatekenak izaten jarraitzen dute. Bezeroak ez du erregistratuko ezta eskatuko ere, bere izenean edo hirugarrenen izenean, Produktuen edo haien osagaien gaineko jabetza industrial edo intelektualeko inolako eskubiderik.
12. Datuen babesa
Kliskatekek Bezeroaren eta haren harremanetarako pertsonen datuak tratatzen ditu eskaera kudeatzeko, bidaltzeko eta fakturatzeko, bere pribatutasun-politikak azaltzen duen bezala.
13. Ezinbesteko kasua
Eskaera bat betetzeko betebeharra eten egingo da ezinbesteko kasuetan (besteak beste, ekoizpen-, garraio- edo bidalketa-arazoak, grebak edo lan-geldialdiak, gerra, lehengai edo osagai falta, edo agintaritzaren egintzak), eta Kliskatekek entrega atzeratu ahal izango du horrek irauten duen bitartean, gehienez ere lau hilabetez. Gehiago irauten badu, Kliskatekek salmenta suntsiarazi ahal izango du, eskaera horrengatik Bezeroak ordaindutakoa itzultzea beste betebeharrik gabe.
14. Deuseztasun partziala, uko egitea eta akordio osoa
Klausularen bat deusez deklaratzen bada, kendu egingo da edo ahalik eta antzeko efektu tekniko eta ekonomikoa duen beste batekin ordeztuko da, gainerakoari eragin gabe. Kliskatekek une jakin batean eskubide bat ez exijitzeak ez du esan nahi eskubide horri uko egiten dionik. Baldintza hauek, berretsitako aurrekontuarekin edo proformarekin batera, Produktuen salmentari buruz alderdien artean dagoen akordio osoa jasotzen dute, eta aurreko edozein akordio ordezten dute, idatzizkoa nahiz ahozkoa.
15. Lege aplikagarria eta auzitegiak
Baldintza hauek Espainiako legeriaren arabera arautzen dira, bereziki Merkataritza Kodearen arabera, eta Salgaien Nazioarteko Salerosketa Kontratuei buruzko Nazio Batuen Konbentzioa (Viena, 1980) kanpo uzten da.
Alderdiek, beste edozein foruri uko eginez, Donostia / San Sebastián (Gipuzkoa) hiriko epaitegi eta auzitegien mende jartzen dute Baldintza hauei buruzko edozein auzi, haietatik eratorritako edo haiekin lotutako kontratuz kanpoko betebeharrak barne.
16. Hizkuntzak
Baldintza hauek gaztelaniaz, ingelesez, euskaraz eta txineraz argitaratzen dira. Bertsioak bat ez badatoz, gaztelaniazkoa nagusitzen da.